Corde natus ex parentis ante mundi exordium
A et O cognominatus, ipse fons et clausula
omnium quae sunt, fuerunt quaeque post futura sunt.
Ipse iussit et creata, dixit ipse et facta sunt,
terra, caelum, fossa ponti, trina rerum machina
quaeque in his vigent sub alto solis et lunae globo.
O beatus ortus ille, virgo cum puerpera
edidit nostram salutum, feta Sancto Spiritu,
et puer redemptor orbis os sacratum protulit.
Psallat altitudo caeli; psallite omnes angeli!